Doktori shqiptar: Dy vdekje të papritura pasi bënë vaksinën kineze

Mjeku nga Shqipëria, Erion Dashi njofton se kanë ndodhur dy vdekje të qytetarëve që janë vaksinuar me vaksinën kineze Sinovac.

Ai përmes një postimi në Facebook ka treguar se njërin prej rasteve e ka hetuar vetë, dhe se personi ka humbur jetën vetëm 1 ditë pasi ka bërë atë vaksinë.

Postimi i plotë:

Rekomandim drejtuar Ministrisë së Shëndetësisë dhe çështjeve sociale!

Për shkak të të paktën dy vdekjeve të papritura midis personave që kanë kryer vaksinën CoronaVac (një prej të cilave rast i investiguar personalisht që humbi jetën një ditë pas vaksinimit), i rekomandoj Ministrisë së Shëndetësisë, Komitetit të COVID dhe Komitetit të Imunizimit të pezullojnë përkohësisht fushatën e imunizimit me CoronaVac deri sa këto vdekje të investigohen dhe të provohen si të palidhura me vaksinën në fjalë.

Kjo thirrje nuk ka aspak qëllim të ngjallë panik dhe të dëmtojë një proces të dobishëm siç është imunizimi ndaj COVID. Thjesht është në përputhje me praktikat e mira ndërkombëtare të farmakovigjilencës.

Dy humbje jete midis rreth 50 mijë të vaksinuarve është një tregues që kërkon kujdes të jashtëzakonshëm!

Mbetem i hapur për të komunikuar me përfaqësues të ministrisë dhe komitetit lidhur me rastin që kam investiguar personalisht.