Moti i keq pushton veriun e Italisë, vërshojnë përrenjtë

Moti i keq me reshje të mëdha shiu ka përfshirë veriun e Italisë. Dy përrenj në rajonin e Ligurias kanë dalë nga shtrati duke shkaktuar përmbytje në provincën e Savonës, ku është në fuqi alarmi portokalli, i cili sipas autoriteteve lokale, do të bëhet i kuq nga ora 14:00.

Autoritetet e Ligurias kanë këshilluar qytetarët të shmangin sa më shumë dalje dhe të bëjnë kujdes maksimal, ndërsa shkollat janë mbyllur.

Autostrada mes Cuneo dhe Savona është mbyllur si një masë paraprake. Gjithashtu, është pezulluar qarkullimi i trenave në linjën Savona-Torino për shkak të rrëshqitjeve të dheut.

Rekordi i reshjeve të shiut është regjistruar në Montenotte Inferiore dhe në Savona, ku kanë rënë 400 milimetra shiu në vetëm 6 orë, një sasi e cila në disa pjesë të Italisë është e barabartë me reshjet e një viti.

“Orët e ardhshme pritet të jenë shumë delikate, pasi parashikohet një përkeqësim i mëtejshëm i motit në Savona dhe Genoa, të cilat do të jenë në alarm të kuq nga ora 14:00. Shmangni të gjitha lëvizjet e panevojshme dhe bëni kujdes maksimal”, ishte thirrja e presidentit të rajonit të Ligurias, Giovanni Toti, drejtuar qytetarëve.