Mustafa: Dialogut po i humb kuptimi, është shndërruar në instrument të Serbisë

Kryetari i LDK-së, Isa Mustafa ka folur rreth ndërmjetësimit të Bashkimit Evropian për dialogun Kosovë-Serbi, ku thotë se përkushtimi i Kosovës nuk po vlerësohet dhe dialogut i ka humbur kuptimi.

Mustafa në një reagim në Facebook, ka thënë se Brukseli s’po e vlerëson konstruktivitetin e Kosovës dhe se BE-ja po tenton të hapë tema të cilat janë diskutuar në procesin e Vjenës para shpalljes së pavarësisë.

“Por ky përkushtim i yni, kam përshtypje se nuk po vlerësohet nga BE. Bile ka tendenca të hapen disa tema që janë të njëjtat me ato që janë diskutuar në procesin e Vjenës. Ndërkaq, Kosova e ka shpallur pavarësinë me mbylljen e atyre temave në “Pakon e Ahtisarit”, ka shkruar Mustafa.

Ai po ashtu ka kërkuar shpjegim nga BE-ja sesi dialogu për marrëveshje gjithëpërfshirëse që rezulton me njohje reciproke, do të përfundojë pas zotimit të ministrave në qeverinë e re serbe se “do të jem i përkushtuar ruajtjes së Kosovës e Metohisë brenda Republikës së Serbisë”.

Postimi i plotë:

Me sjelljet e Sebisë, në njërën anë dhe të BE-së, në anën tjetër, dialogu po e humb kuptimin. Sa po rrjedh koha, ai më shumë po shndërrohet në instrument të Serbisë për të blerë kohë për ti vënë në harresë krimet e saj.

Kosova e vlerësoi fjalimin e një deputeti shqiptar në Parlamentin e Serbisë. Ai e tha të vërtetën!

Por ne dëgjuam edhe betimin e çdo ministri serb, tjerë përveç serbëve nuk ka në “demokracinë serbe” se “ do të jem i përkushtuar ruajtjes së Kosovës e Metohisë brenda Republikës së Serbisë”.

Shtrohet pyetja si konvergjon dialogu për marrëveshje gjithëpërfshirëse që rezulton me njohje reciproke me këtë zotim të qeverise serbe! A mundet BE të jap shpjegimin e saj?

Kosova është treguar konstruktive karshi dialogut dhe angazhimit të BE-së dhe SHBA-së për këtë proces. Edhe Kryeministri Hoti po tregon përkushtim shumë konstruktiv.

Por ky përkushtim i yni, kam përshtypje se nuk po vlerësohet nga BE. Bile ka tendenca të hapen disa tema që janë të njëjtat me ato që janë diskutuar në procesin e Vjenës. Ndërkaq, Kosova e ka shpallur pavarësinë me mbylljen e atyre temave në “Pakon e Ahtisarit” .

Kundërshtimi i vendeve të caktuara të BE-së për liberalizimin e vizave për qytetarë e vendit tonë, edhepse janë përmbushur të gjitha kriteret, më shumë flet për një qëndrim paragjykues të tyre, sesa për parime. Ne kemi dëshirë të besojmë se vendet e tilla ia duan të mirën Kosovës. Por kjo ide nuk pasqyrohet përmes politikave të izolimit të qytetarëve të një vendi. Politikat e izolimit nuk përkojnë me demokracinë dhe kulturën evropiane. Ndërkaq ne nuk heqim dorë nga të qenurit evropian, me territor, me arsim, me kulturë e me ekonomi. As vizat dhe as Serbia nuk na ndalin në këtë rrugë. IM